Амаль усе крамы, прадпрыемствы, установы горада ўжо маюць упрыгожанні. Яно і не дзіўна - неўзабаве Каляды, а потым і Новы год. Наш сайт пакажа толькі некалькі перадсвяточных фотаздымкаў нашага цудоўнага горада, святочнае ўбранне вітрынаў, прадпрыемстваў. Ведаем, што гэтыя фотаздымкі парадуюць і дадуць святочны настрой асабліва тым аршанцам, якія правядуць святы па-за родным горадам - у іншых гарадах, краінах і нават на іншых кантынентах.
Завод "Чырвоны барацьбіт" перад святам паставіў на даху фігуркі жывёлаў, прыкладна тое ж зроблена і ў СШ № 20. "Белпошта" радуе неонавымі агнямі, у святочную ілюмінацыю ўбраліся і Гарадскі стадыён з Паркам атракцыёнаў. Каля друкарні пастаўленая маленькая ялінка, а ялінка побач з прахадной ільнокамбіната - адна з найбольш светлых, каляровых ва ўсёй Оршы. Ювелірная крама "Сапфір" мае святочныя зніжкі і не забывае пра ўпрыгожанне на сваіх вітрынах. Цэлы каляровы гадзіннік, як і ў папярэдні год, размешчаны на мясакамбінаце, камбінат увесь свеціцца ілюмінацыяй.
