27-гадовы гамельчанін мае насычаную біграфію - пры пяці класах адукацыі, ён ужо адбываў пяты тэрмін за махлярства. Новы тэрмін злачынца "матаў" у аршанскай калоніі за тое, што падмануў 20 аўтамібілістаў - купляў іх машыны, абяцаючы аддаць грошы пазней. Канешне, грошы да прадаўцоў не даходзілі.

Сядзець без справы было нецікава і з-за кратаў быў наладжаны працяг махлярстваў. У турме ў гамельчука быў тэлефон з выхадам у інтэрнэт і некалькі сім-картаў. На волі пагадзіўся дапамагчы за 50% выручкі сябра. Адзін саўдзельнік - які быў за кратамі - знаходзіў прадаўцоў аўто, сазваньваўся і дамаўляўся. Другі павінен быў сустракацца з імі, пераафармляць машыны і абяццаць аддаць грошы пазней.

Такім чынам, на дваіх "набыўшы" Аўдзі за 5.800 даляраў за выдуманыя грошы, прадалі гэты аўтамабіль за рэальныя 3.300. Праўда, усе грошы так і засталіся ў руках таго, хто яшчэ быў на свабодзе - да Оршы грошы не даехалі. З другога аўтамабіля вязень таксама нічога не атрымаў - сябра прайграў усе грошы на аўтаматах. А з трэцяга аўтамабіля грошы не атрымалі ні адзін, ні другі - яшчэ адзін сябра кампаніі, які пагадзіўся прадаць аўто ў іншы горад, прадаў яго, але грошы, як сказаў, згубіў.

Калі ж схема раскрылася і справай занялася міліцыя, аказалася, што аўтамабілі паспелі па некалькі разоў памяняць сваіх уладальнікаў.

У выніку, да яшчэ не адсіжанага тэрміну гамельчук атрымаў дадатковыя 4 гады, а другі суўдзельнік - 3 гады.