Пракатчыкі фільма зрабілі вельмі паспяховы рэкламны ход - яны заклікалі прыйсці на прагляд кіно пра супергероя 14 лютага (Дзень святога Валянціна) тых, хто будзе ў гэты дзень без пары. Але ў Оршы на апошні сеанс у гэты дзень прыходзілі людзі не толькі самотныя, але і закаханыя. Адна такая пара сарвала авацыі ўсёй залі.

Традыцыйна перад паказам фільма на экране круцяць асобныя рэкламныя ролікі і анонсы будучых прэм'ераў. Калі ў залі згасла святло, на экране з'явіўся малады хлопец, які пераглядаў фотаздымкі, на якіх ён разам са сваёй дзяўчынай. Па першых кадрах было складана зразумець, што рэкламуецца - кіно, сацыяльная рэклама, ці крама "Царскае золата". Бо, праглядзеўшы фотаздымкі, хлопец сеў за руль і паехаў у названую краму. Далей у краме малады чалавек купляе залатое кальцо, зноў сядае ў аўтамабіль і прыязжае да ГЦК - дзе і быў паказ фільма. Хлопец хутка выходзіць з машыны, ідзе да кінатэатра. Апошні кадр роліка - хлопец хутка прабягае праз фае кінатэатра. У гэты момант ролік спыняецца, ў залі зноў уключаецца святло. І ў залю ўваходзіць той самы маладзён з кветкамі і кальцом. Расчуленая дзяўчына, якая, седзячы ў залі, бачыла ўвесь ролік, выйшла насустрач і атрымала ад сваго жаніха не толькі кветкі ды кальцо, але і прапанову выйсці замуж. Пад гучныя авацыя залі, дзяўчына дала сваю згоду.