Надыход цёплага надвор'я, таянне снегу і лёду на рацэ Аршыцы раскрылі несамавітую праўду пра некаторых жыхароў нашага горада. Снег і лёд пачалі таяць, плынь павялічылася, і ў раёне невялікага чырвонага масточка, дзе ў бок млына адыходзіць канал, сабралася шмат смецця. Гэта і пластыкавыя бутэлькі, і абломкі дошак, і цэлафанавыя пакеты. Адным словам, людзі, якія адпачываюць у раёне ракі, не абцяжарваюць сябе паходам да сметніцы, якіх шмат у цэнтры горада, у тым ліку і ўздоўж набярэжнай Аршыцы. У выніку ў самым цэнтры Оршы, на Замчышчы, Аршыца выглядае жахліва.
Пакуль асобныя ініцыятыўныя людзі добраахвотна прыбіраюць смецце ў лесапарках, на рэчках, у іншых месцах горада, знаходзяцца і тыя, хто не мае элементарнай культуры і працягвае засмечваць прыроду. Любая выкінутая рэч у выніку прыводзіць да такой жахлівай карціны, якую цяпер назіраюць аршанцы ў раёне Замчышча. Куды лягчэй разважаць пра тое, якая недасканалая родная Орша і тут жа шкодзіць сабе ж.
