Хлопец вучыцца на 5-м курсе адной з навучальных устаноў горада Магілёва. Разам з сябрамі 23-гадовы малады чалавек адправіўся адзначыць паспяховае заканчэнне сесіі. Іспыты здадзены, можна выпіць і алкаголю. Калі б невялічкім святкаваннем на вуліцы Ленінскай усё скончылася, ніхто б не пацярпеў.
Аднак студэнту-аршанцу, здаецца, бракавала яскравых эмоцый. Ён залез на капот чужой машыны і стаў на ім танчыць. Палкі танец скончыўся пашкоджаннем "пляцоўкі" - таго самага капота. Як паведамілі ў прэс-службе УУС Магілёўскага аблвыканкама, студэнт спакойна з'ехаў у родны горад, а ўжо ў самой Оршы яго знайшла міліцыя, калі высветлілася, што танцорам быў менавіта ён.
Следчы камітэт завёў крымінальную справу па частцы 1 артыкула 339 Крымінальнага кодэксу РБ. Цяпер хлопцу пагражае пакаранне ў выглядзе арышту на тэрмін да 6 месяцаў альбо пазбаўленне волі на тэрмін да 3 гадоў.
