Перад гульнёй фаварытам матчу збольшага прызнавалі "Оршу", пагатоў яна гуляла ў сябе дома. Суткі дагэтуль і ў дзень самога матчу на Оршу абрынуўся цыклон, дождж ліў бясконца. Гэта паўплывала на саму гульню. Але не сказаць, што ў адмоўным сэнсе. Атакі аршанцаў на першых хвілінах прынеслі плён - адносна хуткім мячом вызначыўся капітан "ільняных" Дзмітрый Вусачоў, які паразіў браму гасцей ударам галавы. Аднак у планах "Тарпеда" было перамагчы "Оршу", каманды ў незалежнай Беларусі сустракаліся двойчы і абодва разы перамогу святкавалі сталічныя гульцы. Але да перапынку першая за 22 гады гульня ішла паводле плану "Оршы", 1:0, каманды сышлі ў распранальні.
А вось у другім тайме "Оршу" нібыта падмянілі, на 51-й Аляксей Тхагалегаў згуляў на апярэджанне галавой, і аршанцы не знайшлі што супрацьпаставіць тарпедаўскаму абаронцу. А на 59-й хвіліне адзіны гол у матчы забіў не абаронца, а нападнік. Фёдару Сапону гаспадары дазволілі і высока скокнуць, і трапна прабіць, мяч ад штангі заляцеў у браму - 1:2. Затым аўтазаводцы працягнулі наступ, а ў аршанцаў гульня не ішла. Вячаслаў Камінскі некалькі разоў за другую палову ратаваў сіня-белых ад буйных праблем, пры тым што ў першым тайме яму давялося па сутнасці толькі аднойчы сур'ёзна ўступаць у гульню. Аршанцы знайшлі сябе толькі пад канец матчу і пайшлі на штурм брамы гасцей. Сталі з'яўляцца моманты. У выніку на 90-й хвіліне Дзмітрый Вусачоў, зноў упушчаны абаронцамі "Тарпеда", на гэты раз ужо нагой пераправіў прастрэл Валерыя Марава з правага флангу ў браму - 2:2.
"Орша" ратуе нічыю і разыходзіцца з супернікам мірам у чацвёрты раз запар. А ўсяго ў аршанцаў адна перамога і пяць нічыйных вынікаў.
Састаў "Оршы": Камінскі, Вусачоў, Пракопчык, Мараў, Магаль (Гігевіч, 80), Шыбека, Жданок (Знак, 65), Чарнуха (Суздальцаў, 70), Зямко, Грачыха (Галоўчык, 79), Хадневіч.
