Жыткавічы — невялічкі горад з 15 тысячамі жыхароў на Палессі. Да Оршы амаль 450 кіламетраў і ўсяго 133 кіламетры да Украіны. На рэспубліканскім узроўні клубы з Жыткавічаў практычна не з'яўляліся, а апошні раз гулялі супраць "Оршы" ў 1979 годзе. Тады аршанскі "Старт" фінішаваў 7-м у чэмпіянаце БССР, а жыткавіцкі "Меліяратар" стаў 9-м.
Каманда ЮАС (ад назвы фірмы "ЮА-Строй") была заснавана ў 2014 годзе і адразу заявілася ў 2-ю лігу беларускага чэмпіянату. Большасць жыткавіцкай каманды складаюць мясцовыя футбалісты, чым у гарадку вельмі ганарацца. Футбольныя вынікі пакуль невысокія. Летась каманда заняла апошняе месца ў лізе, прайграўшы 17 з 18 матчаў. Сёлета пачатак чэмпіянату выразна акрэсліў нізкі статус ЮАСа, каманда саступіла ва ўсіх 5 матчах, якія правяла да старту ў Кубку Беларусі.
Матч 1/32 фіналу Кубка Беларусі ЮАС — "Орша" адбудзецца на стадыёне "Цэнтральны" ў Жыткавічах 11 чэрвеня а 16:00. Каманда-пераможца выйдзе ў 1/16 фіналу. Прайграўшы выбывае.
