Ікамос штогадова ладзіць летнікі ў розныя рэгіёны краіны з рознымі мэтамі. У гэтым годзе мэту летніка падказалі супрацоўнікі міністэрства культуры пасля падзеяў звязаных з разбурэннем будынку былога манастыра дамініканцаў у Смалянах. Тады дзякуючы ў тым ліку спецыялістам - сябрам ГА "Беларускі камітэт ІКАМОС" руйнаванне магчымага гістарычнага помніку было спынена. Але адразу з'явілася пытанне што рабіць далей як непасрэдна з будынкам былога манастыра, так і са Смалянамі ўвогуле.

Вёска па колькасці і каштоўнасці помнікаў не саступае такім турыстычным цэнтрам як Мір ці Нясвіж, але большасць помнікаў знаходзяцца ў кепскім стане. У сувязі з кепскім станам помнікаў і адсутнасцю праграмы па развіцці Смалянаў колькасць турыстаў тут мізэрная ў параўнанні з патэнцыялам. Паспрабаваць вырашыць гэтую праблему і меў на мэце летнік "ІКАМОС", які праходзіў напрацягу тыдня і скончыўся ў гэтую нядзелю.

Сярод мэтаў якія ставіліся арганізатарамі летніку значыліся наступныя: - падрыхтоўка прапаноў па захаванні і выкарыстанні руінаў манастыра XVIII ст.; - апісанне ўсёй гістарычнай забудовы Смалян з мэтай рэгістрацыі іх, як цэласнага гісторыка-культурнага комплекса; - інвентарызацыя навакольных могілак. -добраўпарадкаванне Спасапрэабражэнскай царквы XVIII ст.

Пры гэтым, сярод удзельнікаў летніка былі прафесійныя архітэктары, мастакі і гісторыкі, якія маюць кампетэнцыю ў азначаных пытаннях. Цяпер напрацаваныя вынікі летніку будуць апрацоўвацца і ў хуткім часе паступаць ў міністэрства культуры.