Футбольны клуб “Орша” ў 12-м туры чэмпіянату Беларусі сярод каманд 1-й лігі гуляў у Менску з “Промнем”. Матч адбыўся ў суботу, 16-га ліпеня. Стартавы склад аршанцаў выглядаў так: Гудзенка, Пракопчык, Лебедзеў, Магаль, Мараў, Жданок, Шыбека, Зямко, Гігевіч, Грачыха, Хадневіч.
Каманда гадзіннікавага заводу ўжо на 16-й хвіліне займела гандыкап у адзін мяч пасля голу Вілейты. Варта адзначыць, што ў Менск аршанцы адправіліся з адным брамнікам – Яўгенам Гудзенкам. Вячаслаў Камінскі, які сёлета гуляе ў асноўным складзе, адсутнічаў. На вялікі жаль, ягонаму дублёру не ўдалося паказаць высокі клас, як ён неаднаразова рабіў раней, ратуючы “Оршу” ад вялікіх праблемаў. На гэты раз сітуацыя разгортвалася іначай – гульцы “Промня”, як падалося, з парушэннем правілаў адабралі мяч у “льняных” у цэнтры поля, арбітр прамаўчаў. Пайшла імклівая атака на браму “Оршы”, гулец менчукоў выйшаў сам-насам з Гудзенкам, і Яўгену заставалася толькі парушаць правілы. Чырвоная картка брамніку і пенальці. А паколькі другога брамніка ў аршанцаў не было, у браму стаў нападнік Аляксей Хадневіч, які апрануў швэдар Гудзенкі.
Пенальці Хадневіч не адбіў – Расолька зрабіў лік 2:0. Затым сітуацыя стала складвацца для аршанцаў яшчэ горш. Баскакаў, Козел і зноў Вілейта падпісалі “прысуд” гасцям. 5:0, у такой сітуацыі нават спадзяванні на цуд здаваліся лішнімі. На 80-й хвіліне футбаліст “Промня” адштурхнуў суперніка рукамі, пенальці, і Хадневіч, які прыбег з брамы, забіў з 11-метровага. 5:1.
На замены ў “Оршы” выходзілі Данілкоў, Знак, Галоўчык і Чарнуха. Галоўчык пайшоў узмацняць атаку да Грачыхі і Зямко, гуляў дастаткова актыўна, але ўрэшце атрымаў дзве жоўтыя карткі і быў выдалены. Апошнія чатыры хвіліны аршанцы гулялі ўжо ўдзевяцёх.
Orsha.eu праводзіў тэкставую трансляцыю сустрэчы “Прамень” – “Орша”. У турнірнай табліцы наша каманда апусцілася на 8-е месца.
