Пра гэта галоўны трэнер “Оршы” распавёў у інтэрв’ю газеце “Прессбол”. Адказваючы на пытанне, чаму клуб толькі фармальна заявіў на матч з “Промнем” Вячаслава Камінскага, а насамрэч каманда прыехала ў сталіцу толькі з адным галкіперам, Юрый Канаплёў распавёў:

Слава ў чацвер захварэў. У пятніцу недамаганне не адступіла. Папрасіў яго хоць бы на лаўцы пасядзець - не змог нават проста прыехаць у Менск! Так што Камінскага ўнеслі ў заяўку на гульню ўмоўна. Чаму ў камандзе няма маладога брамніка? У нас у горадзе яны такія, што лепш ужо на палявога гульца ў падобных сітуацыях разлічваць. Так што будзем звяртацца ў "Віцебск" - і маліць Бога, каб каго-небудзь са сваіх аддалі нам у арэнду.

Нагадаем, што браму “Оршы” ў матчы з менскім “Промнем” абараняў Яўген Гудзенка. На 24-й хвіліне сустрэчы ён быў выдалены за пазбаўленне суперніка яўнай магчымасці забіць гол, а паколькі прозвішча “Камінскі” значылася ў заяўцы “Оршы” чыста фармальна, брамнікам на астатні час матчу стаў намінальны нападнік “сіня-белых” Аляксей Хадневіч.

Падобная ацэнка галоўным трэнерам яскрава сведчыць пра тое, што галоўная каманда стала працаваць у адрыве ад футбольнай школы. У гэтым аршанскія заўзятары вінавацяць як кіраўніцтва горада, якое так і не прыдумала спосаб наблізіць юнацкія каманды да асноўнага складу, так і трэнерскі штаб, які ад самага пачатку зрабіў стаўку на іншагародніх футбалістаў, а аршанскім амаль не дае шанцаў праявіць сябе. Некаторыя маладыя гульцы, якія раней падпускаліся да асноўнага складу і нават адзначаліся неблагой гульнёй, цяпер не трапляюць нават на лаўку запасных. Пры гэтым вынікі “Оршы” далёкія ад ідэальных – пасля 12 тураў 1-й лігі “сіня-белыя” знаходзяцца толькі на 8-м месцы сярод 14 каманд.