Прынцыповы для аршанцаў матч адбудзецца 18-га верасня, у нядзелю. Супернікамі “сіня-белых” будуць футбалісты сталічнага “Тарпеда”. Каманды сустракаліся шмат разоў у савецкія часы, калі спаборнічалі ў чэмпіянатах БССР. Часцей за ўсё вышэй у выніковай табліцы тады аказваліся аўтазаводцы, якія чатыры разы былі чэмпіёнамі, але і “Старту” ўдавалася апярэджваць “Тарпеда”. У перыяд незалежнай Беларусі гэта будзе чацвёрты матч паміж камандамі. Пакуль “Орша” яшчэ не перамагала супернікаў у гэтыя часы – дзве паразы з лікам 1:3 і нічыя 2:2 у першай палове сёлетняга сезону. Тады аршанцы на сваім стадыёне вялі ў ліку 1:0, але прапусцілі двойчы і апынуліся на мяжы пройгрышу. Толькі гол у апошнія хвіліны ўратаваў “сіня-белых” ад хатняй паразы.
На дадзены момант у турнірнай табліцы “Орша” з 24-ма пунктамі займае 6-е месца. Тарпедаўцы маюць 19 пунктаў і знаходзяцца на 11-м радку. Матч “Тарпеда” – “Орша” адбудзецца 18-га верасня ў Менску на стадыёне “Тарпеда” (адрас: вуліца Катоўскага, 2). Старт матчу прызначаны на 16:00.
