У чэмпіянатах Беларусі аршанцы дагэтуль сустракаліся са смаргонцамі 5 разоў. У 2005 годзе аршанцы здабылі гасцявую перамогу 3:2, аднак на сваім полі прайгралі 0:5. Наступны раз каманды сустрэліся праз дзесяць год. У 2005-м смаргонцы не пашкадавалі "ільняных" на сваім полі - 6:0, а матч у Оршы скончыўся ўнічыю 1:1. У чэмпіянаце-2016 "Орша" стартавала цудоўна і доўга не мела паразаў, аднак менавіта матч сёмага туру ў Смаргоні быў першым няўдалым - 0:3.
Такім чынам, у пяці папярэдніх матчах "Орша" толькі аднойчы перамагала смаргонцаў, агульны баланс такі: +1=1-3, 4-17 на карысць "Смаргоні".
Але гульня першага кола сезону-2016 была скандальнай. Менавіта пасля яе "Смаргонь" улезла ў адну непрыемную гісторыю. Тады праз некалькі дзён адбылося затрыманне траіх чалавек - главы дэпартамента інспектавання і судзейства Беларускай федэрацыі футбола Андрэя Жукава, арбітра Андрэя Сарокі, які абслугоўваў матч "Смаргонь" - "Орша" (3:0) і галоўнага трэнера смаргонцаў Мікалая Рындзюка. У праваахоўных органах правяраўся шэраг паведамленняў пра нячыстую гульню, у тым ліку пад падазрэнне трапіў і матч "Смаргонь" - "Орша", які скончыўся з лікам 3:0 на карысць смаргонцаў.
Арбітр Сарока тады быў выпушчаны, а галоўны трэнер "Оршы" Юрый Канаплёў і яго асістэнт Сяргей Чавідаеў пасля буйной паразы мелі шэраг прэтэнзій да суддзі, які, на іх думку, засудзіў "Оршу" і дапамог "Смаргоні" зарабіць тры пункты ў табліцу. Рулявы "Смаргоні" Мікалай Рындзюк, як і Сарока, быў пераведзены са стану абвінавачваемых у стан сведкаў па справе Жукава, а Беларуская федэрацыя футбола парэкамендавала смаргонцам адхіліць Рындзюка ад трэнерства на час расследвання крымінальнай справы, што і было зроблена. На дадзены момант абавязкі трэнера ў "Смаргоні" выконвае Аляксей Дварэцкі.
Матч "Орша" - "Смаргонь" меўся адбыцца ў суботу, аднак супернік аршанцаў папрасіў федэрацыю перанесці матч на нядзелю ў сувязі з выступленнем каманды ў Кубку Беларусі. БФФ пайшла насустрач "Смаргоні", але клубу гэта не дапамагло - ён без шанцаў у 1/8 фіналу прайграў "Слуцку" 0:3 і выбыў з турніра. Цяпер смаргонцы паспрабуюць здабыць перамогу на выездзе ў Оршу, матч прызначаны на 25-га верасня і пачнецца а 16:00. Гульня пройдзе на Гарадскім стадыёне нашага горада.
