Гульня 8-га туру чэмпіянату Беларусі па міні-футболе ў Вышэйшай лізе праходзіла ў спартовым комплексе “Алімпіец”. Аршанскі “Вітэн” ужо на 1-й хвіліне прапусціў гол ад “Барысава-900”. Хуткі прапушчаны мяч дазволіў аршанцам мабілізавацца. “Чырвона-чорныя”, якія гулялі ў белай форме, павялі няспынныя атакі на браму барысаўчанаў і ўжо на пачатку прымусілі гасцей лічыцца са сваёй перавагай. На 7-й хвіліне капітан аршанцаў Гусакоў зраўняў лік – 1:1.
“Барысаў-900” меў лічаныя моманты для ўзяцця брамы, а вось у “Вітэна” такіх момантаў была процьма – некалькі разоў гаспадары прабівалі ў штангі, а яшчэ бліскуча праявіў сябе брамнік барысаўчанаў Рузін, ён ратаваў нават там, дзе гэта не ўяўлялася магчымым. Перавага ў валоданні мячом, у галявых момантах, у тэрыторыі не дапамагла, аднак, “Вітэну” здабыць такую неабходную перамогу. Каманда застаецца ў сярэдзіне табліцы.
