Першы месяц года адзначыўся чарговым супрацьстаяннем прадпрымальнікаў-рыначнікаў і ўладаў. Аршанскія ІП некалькі разоў выходзілі да выканкаму, але іх патрабаванні выніку не прынеслі. Адна з сустрэчаў выканкамаўцаў з ІП скончылася тым, што чыноўнікі параілі ім ісці працаваць у калгасы, праўда, потым адмаўлялі гэты факт.
У гэтым жа месяцы прагучаў прысуд жанчыне, якую прызналі вінаватай у аварыі, у якую патрапіў картэж прэзідэнта які ехаў з Александрыі. Следства скончылася даволі хутка - крыху больш за паўгады, а прысуд быў - 5 год без накіравання ў калонію.
У грамадскім жыцці рэгіёна ў студзені адбыліся дзве значныя падзеі: як кажуць, добрая і кепская. Добрая навіна ў тым, што ўпершыню грамадская кампанія, распачатая на Аршаншчыне, патрапіла ў спіс намінантаў прэміі "Чэмпіёны грамадзянскай супольнасці". Гаворка ідзе пра кампанію, якую ў 2015 годзе распачала АМГА "Звяз" пад агульным слоганам "Мы аршанцы, мы беларусы". "Чэмпіёны грамадзянскай супольнасці" — самая прэстыжная прэмія краіны для грамадскіх арганізацый, і ўпершыню за ўвесь час яе існавання у спіс "чэмпіёнаў" патрапіў намінант з нашага рэгіёну.
І кепская навіна: 19-га студзеня памёр старшыня раённай структуры сацыял-дэмакратычнай партыі (грамада) Фёдар Муханаў. Муханаў пражываў у Бабінічах, займаўся фермерствам, будучы кандыдатам сельскагаспадарчых навук.
У хуткім часе мы апублікуем апытанне "Самая значная падзея года". Таму кожны дзень будзем ставіць артыкулы пра падзеі месяца. Прапануем вам у каментарах выказвацца, якая з "навінаў месяца" мае права патрапіць у спіс галоўных падзеяў года.
