Зборная Беларусі прабілася ў 1/8 фіналу чэмпіянату свету па гандболе. Аршанец Вячаслаў Салдаценка, як і чакалася, асноўны брамнік каманды на мундыялі. Але пачынаўся групавы этап для аршанца не найлепшым чынам. У першай сустрэчы, якую Беларусь прайграла камандзе Чылі 28:32, Салдаценка меў каэфіцэнт надзейнасці толькі 17%, таму трэнеры замянілі яго на другога брамніка Вячаслава Мацкевіча. У другой сустрэчы беларусы змагаліся з Савудаўскай Аравіяй і перамаглі 29:26. Тут Салдаценка згуляў амаль усю сустрэчу з высокім каэфіцэнтам надзейнасці ў 25% парыраваных кідкоў.
Наступная сустрэча з Харватыяй завяршылася паразай нашых землякоў 25:31. Тут Салдаценка правёў не самую ўдалую гульню, толькі 18% надзейнасці, 3 адбітых кідкі з 18. Яго калега Мацкевіч, які замяніў Вячаслава, для параўнання меў 35%. Прайграная гульня немцам з тымі ж лічбамі, што і харватам 25:31, паставіла нашу каманду на мяжу растання з турнірам. І тут Вячаслаў Салдаценка не здолеў адбіць ніводнага з трох 7-метровых, а яго паказчык склаў толькі 14% ліквідаваных пагроз, у Мацкевіча ж было 30%.
У цэлым гульня не была ідэальнай, аднак на старце матчу з Венгрыяй галоўны трэнер беларусаў Юрый Шаўцоў зноў зрабіў стаўку на Вячаслава Салдаценку. Аршанец згуляў так, што ў трэнерскага штабу не было і думкі замяніць яго, у выніку ўсе 60 хвілін сустрэчы Салдаценка быў на пляцоўцы. Перамога альбо нічыя з венграмі выводзіла беларусаў у плэй-оф, параза выбівала нашу каманду з турніру. Гульня Салдаценкі на браме стала адной з асноўных прычынаў перамогі беларусаў 27:25. Венгры 42 разы пагражалі браме, аднак Салдаценка ўзяў 17 іх кідкоў! Акрамя таго, яму ўдалося парыраваць два 7-метровыя з пяці. Найвышэйшы за турнір паказчык у 40% надзейнасці, Беларусь перамагае ўва многім дзякуючы гульні аршанскага галкіпера!
Цяпер у 1/8 фіналу зборная Беларусі згуляе з камандай Швецыі. Сустрэча адбудзецца ў горадзе Ліль на арэне "П'ер Маруа" 22-га студзеня. Пачатак а 18:00 па беларускім часе, матч будзе транслявацца тэлеканалам "Беларусь 5".
Іншыя пары 1/8 фіналу: Нарвегія - Македонія, Францыя - Ісландыя, Расея - Славенія, Бразілія - Іспанія, Венгрыя - Данія, Нямеччына - Катар, Харватыя - Егіпет.
