Дэпутат Палаты прадстаўнікоў Нацыянальнага сходу Рэспублікі Беларусь Людміла Дабрыніна распавяла, што ў Оршы на прыём да яе па пытаннях Дэкрэта № 3 прыйшоў толькі адзін чалавек. У парламенце Дабрыніна працуе старшынёй пастаяннай камісіі па бюджэце і фінансах. Усяго за час прыёму ў Оршы да Дабрынінай звярнулася 17 чалавек, і толькі адзін з іх задаў пытанне пра выкананне Дэкрэта № 3 "Аб папярэджанні сацыяльнага ўтрыманства". Словы Дабрынінай наконт прыёму прыводзяць "Белновости":

У мужчыны ў войску служыць сын, які скончыў вучэльню, але не здолеў працаўладкавацца. Яго хвалявала, што ад маладога чалавека могуць запатрабаваць плаціць збор за няўдзел у фінансаванні дзяржаўных выдаткаў. Я яму сказала, што перажываць з гэтай нагоды не варта.

У Оршы 12-га сакавіка адбылася адна з самых масавых і рэзанансных акцый ва ўсёй Беларусі, звыш 1 000 чалавек прыйшло на "Марш недармаедаў". Перад ім і пасля яго ўлады правялі шэраг вобшукаў і затрыманняў. У выніку шэраг людзей атрымаў содні зняволення, некалькі чалавек былі аштрафаваныя. Але аршанцаў гэта не спыніла, яны працягваюць выказваць сваю незадаволенасць цяжкім эканамічным становішчам роднай краіны. Тысячы жыхароў Аршаншчыны вымушаныя зарабляць на хлеб у суседняй Расеі, бо не маюць працы і стабільнага заробку на Радзіме.