Скандальная байкерская арганізацыя "Начныя ваўкі", якіх узначальвае адыёзны Аляксандр Залдастанаў, запланавала ўжо трэці ў сваёй гісторыі мотапрабег ад Масквы да Берліна. Як паведамляюць на сваіх рэсурсах байкеры, мотапрабег ладзіцца ў памяць савецкіх воінаў ІІ Сусветнай вайны, якія загінулі. Маршрут сёлета пачнецца 27-га красавіка. Ніжнія Мнеўнікі, Масква, Смаленск, Менск, Берасьце, Варшава, Уроцлаў, Будапешт, Браціслава, Прага, Дрэздэн, Бэрлін - гарады, у якія "Начныя ваўкі" плануюць заязджаць. У Оршу іх мэтанакіраванага візіту не плануецца, але яны будуць праязджаць паўз наш горад.

Але шмат хто з людзей лічаць прабегі "Начных ваўкоў" піяр-акцыямі. Матацыклісты на чале з нараджэнцам украінскага Крапіўніцкага (раней - Кіраваграда) Залдастанавым нават не хаваюць шчыльных сувязяў з прэзідэнтам Расеі Уладзімірам Пуціным. Яны з самага пачатку актыўна падтрымалі акупацыю Крыма "зялёнымі чалавечкамі", вайну з Украінай ў Данецкай і Луганскай абласцях. Разагналі некалькі мірных мітынгаў у самой Расеі, пры гэтым, як кажуць сведкі, збівалі ўдзельнікаў, у тым ліку і жанчын. Пры гэтым, многія іншыя клубы байкераў па ўсёй Расеі і за мяжой не лічаць Залдастанава і кампанію сапраўднымі байкерамі, бо сапраўдныя не павінны фінансавацца з дзяржаўных крыніц, звычайна гэта садружнасць вольных людзей, якія купляюць і рамантуюць байкі выключна за свой кошт.