Нажаль, назваць гэтую сям'ю шчаслівай цяжкавата - і тата і маці доўгі час злоўжывалі алкаголем з-за чаго і патрапілі пад увагу сацыяльнай службы. І аднойчы дваіх сыноў (старэйшаму зараз 8 гадоў, а малодшаму - 3) ужо забіралі з сям'і на паўгады на забеспячэнне і выхаванне дзяржавы. Абодва бацькі рабілі спробы пазбавіцца кепскай звычкі ў час калі гэта, здавалася б, атрымалася, дзяцей ім вярнулі. Але вярнулася і старая залежнасць - зноў алкаголь і ў 2015 годзе іх пазбаўляюць бацькоўскіх правоў. Нават, пры тым, што юрыдычна бацькі ўжо не лічыліся бацькамі, але рэгулярна наведвалі сваіх дзяцей. Тым больш, што братоў падзялілі - старэйшы апынуўся ў Андрэеўшчыне, а малодшага адправілі ў Віцебск. У красавіку 2016 бацька чарговы раз паехаў наведаць свайго малодшага дзіцёнка, але сустракацца з сынам яму забаранілі. Афіцыйная прычына - ён напрацягу года некалькі разоў патрапіў у міліцыю ў стане алкагольнага ап'янення.
І вось, забарона на наведванне свайго сына і стала пераломным момантам у свядомасці бацькоў, абодва пагадзіліся, нават, на кардынальнае медычнае лячэнне. Сям'я спадзявалася, што прадстаўленыя даведкі пра кадзіроўку дадуць падставы для адмены рашэння аб пазбаўленні бацькоўскіх правоў, а яны спрабавалі і раней абскарджваць гэтае рашэнне. Калі бацьку было забаронена наведваць свайго сына, ён пачаў рэгулярна званіць у дзіцячую ўстанову, каб пацікавіцца пра справы дзіцёнка. Пры чарговым званку ў ліпені 2016 года, бацьку паведамілі, што ягоны сын цяпер юрыдычна стаў сынам іншай сям'і - яго ўсынавілі. Хто яго ўсынавіў і дзе зараз знаходзіцца іх сын бацькам не распавялі, паводле закону былі і не абавязаны.
Хаця ўсё адбылося, здавалася б, па закону, бацькі не лічаць такое рашэнне справядлівым і пачалі праз суд абскарджваць усынаўленне іх дзіцёнка. На дадзены момант прайшло ўжо тры судовых паседжанні, але ні разу на суд не прыйшлі новыя бацькі іх сына. Вядома толькі тое, што ўсынавілі іхняга малога мінчане - суды таму і праходзяць у Мінску па месцы жыхарства новай сям'і. Больш тата і мама пра сваё дзіця нічога не ведаюць і пабачыць яго не могуць.
