У Дубровенскім раёне злоўлены "на гарачым" 35-гадовы браканьер, які аказаўся жыхаром Оршы. На тэрыторыі Дубровенскіх паляўнічых угоддзяў мужчына быў засцігнуты на месцы злачынства, калі закопваў парэшткі незаконна забітага лася. Пры гэтым высветлілася, што раней мужчына працаваў...егерам у гэтых месцах, але падазраваўся ў сувязях з браканьерамі і менавіта за гэта быў звольнены, кажуць у Інспекцыі па ахове жывёльнага і расліннага свету.
Калі мужчына ўбачыў інспектараў, ён кінуўся прэч ад яміны, у якую закопваў лася і пусціўся наўцёкі. На бягу ён паспрабаваў пазбавіцца заплечніка, у якім былі субпрадукты - сэрца і лёгкія лася. Але зрабіць яму гэта не ўдалося, ён быў злоўлены. Цяпер за забойства лася мужчыну пагражае крымінальная адказнасць, ён знаходзіцца пад вартай у следчым ізалятары. Калі віна колішняга егера будзе даказаная судом, яму давядзецца сплаціць штраф амаль у 7 тысяч беларускіх рублёў і, верагодна, адправіцца ў турму.
