Камітэт дзяржаўнага кантролю правёў дыхтоўную праверку прадпрыемства "Орша-сэрвіс". Праверка паказала, што прадпрыемства не забяспечыла выкананне натуральных нормаў харчавання школьнікаў у 2016 годзе і першым квартале 2017. Самы нізкі ўзровень у Оршы назіраўся па кандытарскіх вырабах (48%), смятане (58%), тварагу (60%), сыру (72%). У меню, як паведамілі ў Камітэце дзяржкантролю Віцебскай вобласці, уключаліся адны і тыя ж стравы некалькі дзён запар, што не адпавядае рэкамендацыям і патрабаванням. Нормы вымагаюць абмяжоўваць стравы з выкарыстаннем вараных каўбас, сасісак. У буфетах для аршанскіх школьнікаў штодзённа прадаваліся мучныя вырабы накшталт сасісак у цесце, смажанак, піцаў. Ёсць абмежаванне, якое прадугледжвае продаж падобнай прадукцыі не часцей, чым двойчы на тыдзень. Часта ў Оршы парушаліся і масы страваў, была недавага.
Матэрыяльна-тэхнічнае забеспячэнне аб'ектаў харчавання і гандлю ў школах таксама не адпавядае заяўленаму ўзроўню. Ажно ў сямі аб'ектах "Орша-сэрвіс" зафіксавана антысанітарыя. У гэтых кропках выкарыстоўваўся рыштунак з карозіяй, а часам і проста брудны посуд. Былі талеркі і кубкі з расколінамі і адбітымі часткамі, прадукцыя захоўвалася пра неналежнай тэмпературы, а інфармацыя пра тэрмін прыдатнасці часцяком адсутнічала.
Аналагічныя парушэнні выяўлены на прадпрыемстве "Вітміл" у Віцебску. Па выніках грунтоўнай праверкі КДК, 29 работнікаў і суб'ектаў гаспадарання прыцягнуты за свае парушэнні да адміністратыўнай адказнасці. Яшчэ да 26 чалавек прыняты меры дысцыплінарнай адказнасці. У Аршанскім райвыканкаме адбылася адмысловая нарада з разглядам сітуацыі. Чыноўнікам загадана больш уважліва сачыць за выкананнем нормаў па харчаванні школьнікаў у Оршы.
