У Лондане працягваецца чэмпіянат свету па лёгкай атлетыцы. Пакуль беларусы выступаюць на ім не так і ўдала, аднак спадзевы на медалі ёсць. У першую чаргу, яны звязаныя з аршанкай Алінай Талай. Бронзавая прызёрка мінулага чэмпіянату свету, які прайшоў у Пекіне, пачне спаборнічаць у сваёй дысцыпліне 100 метраў з бар'ерамі. У дадзенай дысцыпліне выступіць і яшчэ адна беларуска - Эльвіра Герман. Яна стартуе ў апошнім, 5-м кваліфікацыйным забегу. А вось Аліна Талай стартуе крыху раней - яна пабяжыць у забегу № 3. Ён пачнецца ў 13:01 па беларускім часе, у Лондане ў гэты час будзе 11:01. З усіх суперніц па забегу, Аліна саступае па лепшым паказчыку за кар'еру толькі Кендры Харысан са Злучаных Штатаў. Лепшы час амерыканкі 12,20 с, у Аліны 12,63. Таксама ў забегу паўдзельнічаюць спрынтаркі з ЗША, Аўстраліі, Нігерыі, Грэцыі, Егіпта і Багамскіх выспаў. Для выхаду ў паўфінал неабходна ўвайсці ў чацвёрку лепшых у сваім забегу. Чыста тэарэтычна выйсці можна і з 8-га месца ў забегу, але спартоўкі ад 5-га месца будуць дабірацца па лепшым часе.
За забегам можна назіраць па шматлікіх каналах. Па тэлеканале "Беларусь 5", на ютуб-трансляцыі і па радыё-трансляцыі.
Напярэдадні Аліна гуляла па Лондане і нават зрабіла фотаздымак каля знакамітага моста.
