Калі стваралася так званая "Саюзная дзяржава Беларусі і Расіі" многія ўспрымалі яе як шанец на аднаўленне Савецкага Саюза. У выніку, па-сутнасці, ідэя "Саюзнай дзяржавы" стала мала каму цікавай фармальнасцю, затое яе мерапрыемствы, сапраўды, у нейкім сэнсе аднаўляюць СССР. Такое мерапрыемства з 10 па 16 верасня будзе праходзіць пад Оршай каля вёскі Звёздная. Каля 600 удзельнікаў з Беларусі і Расіі сустрэнуцца тут на турыстычным злёце. У сучасным рынкавым разуменні - турызм гэта сфера эканомікі з усёй эканамічнай інфраструктурай.

Але каля Звёзднай фармат турыстычнага злёту тыпова савецкі: конкурс турыстычнай песні, пасядзлкі каля вогнішча з гітарамі, спартовае арыентаванне, заплечнікі, намёты, швэдры і г.д. Сустрэча ўдзельнікаў злёту таксама была ў савецкіх традыцыях: на вакзале іх сустракала расцяжка "Приветствуем участников...", на вакзале як і ў горадзе было шмат Расейскіх і чырвона-зялёных сцягоў. Фотаздымкі гэтых сцягоў разляцеліся па ўсім інтэрнэце. Найбольш здзівілі сцягі на ўваходзе ў вкзал: калі расейскі сцяг вісеў нармальна, то чырвона-зялёны да гары нагамі. Удзельнікі злёту прайшліся шэсцем ад плошчы Леніна да былога Езуіцкага калегіюму. На працягу гэтага маршрута іх віталі школьнікі, якіх "нагналі" па разнарадцы і якім, відавочна, было не цікава ні сустракаць удзельнікаў, ні, тым больш, чакаць пакуль яны збяруцца.