Адна дарога павінна злучыць Андрэеўшчыну, ці, хутчэй, так званы раён "Цагляны" і раён Гразілаўку. Дарога будзе пачынацца ад тупіковай на сёняшні дзень вуліцы Будаўнікоў а затым перасякаючы чыгунку заходзіць у лес. Праз лес гэтая дарога павінна будзе выходзіць на вуліцу Зарэчную ў Гразілаўцы. У 1982 годзе пры будаўніцтве гэтай чыгункі была выяўлена растрэльная яма ў якой ляжала 50 целаў. Як высветліла адмысловая камісія - усе гэтыя людзі ахвяры сталінскіх рэпрэсіяў. Пры гэтым, выяўленая была толькі адна яма - адна яма запаўнялася за адну ноч растрэлаў, а па сведчаннях старажылаў, стралялі тут далёка не адны ноч. Таму самыя смелыя ацэнкі колькасці ахвяраў у гэтай мясцовасці гавораць і пра магчымыя тры тысячы рэпрэсаваных у лесе на Кабыляцкай гары. Больш за тое, літаральна за які-небудзь кіламетар ад месца дзе растрэльвалі ахвяраў рэпрэсіяў камуністы, ёсць помнік ахвярам фашызму. Сюды фашысты звозілі целы тых каго растрэльвалі ў гарадской турме (сёняшнім помніку "былы езуіцкі калегіюм").
Цікава, што ў тэксце складзенага камісіяй акта ёсць параўнанне гэтага месца растрэлу з "лесам каля вёскі Паддубцы" (сёння вёска аб'ядналася з Панізоўем). Адпаведна, і ў лесе, які сёння пачынаецца ад трэцяга мікрараёна і ідзе ўздоўж Магілёўскай шашы ў свой час былі выяўленыя парэшткі растраляных. Краязнаўцы, валодаючы гэтым дакумантам, адносна дакладна выяснілі месцазнаходжанне месцаў растрэльных ямаў і тут. Яны пачынаюцца, практычна, ад самай аўтазапраўкі і ідуць па два бакі трасы. Па адной з версіяў стралялі тут святароў розных канфесіяў. У дадзеным месцы павінен прайсці кавалак кальцавой дарогі, які пачнецца ад вуліцы 60 год БССР, і па мяжы леса і горада за вадаканалам выйдзе на Магілёўскую вуліцу.
Такім чынам, па двум самым вядомым месцам растрэлаў часоў сталінскіх рэпрэсій павінны прайсці аўтадарогі. Такое раней было і з мінскімі Курапатамі дзе з-за пашырэння кальцавой аўтадарогі двойчы ўзнікалі пратэсты, якія перарасталі ў паўнавартасныя акцыі з начным дзяжурствам валанцёраў. У абодвух выпадках улады ішлі на саступкі і праэкты будаўніцтва дарогі змяняліся.
