Нагадаем, што інцыдэнт адбыўся яшчэ летам, калі зооактывісты прыйшлі ў прыёмнік для бадзяжных жывёлаў спецаўтабазы. Напачатку іх туды прапусцілі без праблемаў, але потым выклікалі міліцыю і абвінавацілі ў незаконным пранікненні на ахоўваемую тэрыторыю. У час затрымання адна з актывістак, Юлія Малышава распачала ў сацыяльную сетку "Аднакласнікі" прамую трансляцыю з месца падзеяў, за што ёй яшчэ інкрымінавалі і стварэнне матэр'ялаў СМІ.
Некаторыя з актывістаў правялі ноч у міліцыі і былі асуджаны судом Аршанскага раёна да штрафаў, абскарджванне ў абласным судзе таксама ні да чаго не прывяло. Наступны этап абскарджвання - падача заявы старшыні абласнога суда. 16 кастрычніка двое актывістаў, якія працягваюць дамагацца справядлівасці, падалі заяву. Звычайна старшыня абласнога суда таксама прымае рашэнне на карысць суда Оршы, але гэты этап трэба прайсці, каб абскарджваць пастанову далей. А актывісты плануюць у будучым падаваць на абскарджванне і ў міжнародныя арганізацыі.
