Пра гэта паведаміла электроннае выданне ex-Press. Паводле выдання ў сакавіку на скарочаны рабочы тыдзень пераходзіць адразу некалькі прадпрыемстваў па краіне: МАЗ, "Гарызонт", "Брэсцкае піва", БАТЭ і наш АМКК.
Пакуль аніводная афіцыйная асоба не падцвердзіла і не абвергла дадзеную інфармацыю. Мы звярнуліся да некалькіх супрацоўнікаў мясакамбінату, якія падцвердзілі дадзены факт. Па словах супрацоўнікаў, некаторыя цэхі ўжо перайшлі на 4 дні, а некаторыя рассоўваюць сваіх супрацоўнікаў па іншых цэхах, каб таксама скараціцца.
Такая сітуацыя была даволі прадказальнай. У мінулым годзе прадпрыемства ўвайшло ў спіс самых стратных акцыянерных таварыстваў краіны, а па стане на канец трэцяга кварталу даход АМКК склаў каля мінус 5 мільёнаў даляраў.
На гэтым пытанне можа не скончыцца. Нагадаем, што паводле дадзеных Белстата на складах Аршаншчыны ў студзені знаходзілася 98,3% прадукцыі вырабленай нашымі прадпрыемствамі за месяц і лічба гэтая адносна мінулага году толькі павялічваецца. Такім чынам, скарачэнне рабочага тыдня можна чакаць і на іншых прадпрыемствах горада.
