Месцы масавых растрэлаў часоў сталінскіх рэпрэсій на Кабыляцкай гары былі выяўлены яшчэ ў 1982 годзе. Пад час будаўніцтва тупіковай лініі чыгункі рабочыя знайшлі адну растрэльную яму з 50 цяламі. Адмыслова створаная камісія прыйшла да высновы, што ўсе 50 целаў - ахвяры сталінскіх рэпрэсіяў, прычым, у акце складзеным камісіяй, праводзіцца паралель з падобнымі пахаваннямі ў лесе каля вёскі Паддубцы (сёння частка Панізоўя). Але на гэтым усе даследванні месцаў растрэлаў археалагічным спосабам скончыліся. Краязнаўцам ужо ў канцы 80-х - пачатку 90-х гадоў 20-га стагоддзя ўдалося сабраць даволі шмат сведчанняў пра іншыя месцы растрэлаў, але дакументальна падцверджанымі да гэтае пары застаюцца толькі двое вышэйназваных. Пры гэтым, колькасць растраляных у абодвух месцах застаецца невядомай - на практыцы адну растрэльную яму запаўнялі за адну ноч, а ў Кабыляках растрэлы ішлі не адну ноч.

Грамадскія арганізацыі раней ужо звярталіся да выканкаму з прапановай правесці археалагічныя даследванні Кабылякоў, але справа з месца не рушылася. У гэтым годзе тэма актуалізавалася наноў дзякуючы грамадскаму абмеркаванню новага генплану горада. Паводле генплану па абодвух месцах растрэлаў павінны прайсці аўтамабільныя дарогі. Пад час правядзення дыскусіі на тэму "Масавыя рэпрэсіі і смяротнае пакаранне" яго ўдзельнікі падпісалі зварот у выканкам з просьбай не пачынаць будаўніцтва гэтых дарогаў да тае пары пакуль не будуць праведзены паўнавартасныя даследванні абодвух урочышчаў.

За подпісам намесніка старшыні выканкаму Аляксандра Пальвінскага падпісаўшымся прыйшоў адказ у якім утрымліваецца абнадзейваючая фраза. Цытуем яе захоўваючы правапіс арыгіналу: "Даследванне месцаў (месцаў растрэлаў - рэд.) ва урочышчы Кабыляцкая гара каля вёскі Панізоўе будзе ажыццяўляцца перад пачаткам будаўнічых работ, па якіх будуць рабіцца высновы".