Прэм'ер-міністр Рэспублікі Беларусь Андрэй Кабякоў наведаў з працоўнай паездкай Аршанскі раён і шэраг прамысловых прадпрыемстваў Оршы, Барані і Балбасава. Журналістам дзяржаўны чыноўнік паведаміў, што прадпрыемствы раёну не рванулі наперад за год, але напрацаваны інвестыцыйныя праекты.

— Казаць пра тое, што прадпрыемства рванулі наперад, пакуль, на жаль, нельга. Але важна, што яны вызначыліся з перспектывамі. У большасці выпадкаў інвестыцыйныя праекты маюць прапрацаваныя крыніцы фінансавання. Асноўны аб'ём работ, звязаны з мадэрнізацыяй, укараненнем новых тэхналогій, набыццём сучаснага абсталявання, разгорнецца у 2018 годзе і часткова будзе завершаны ў 2019 годзе. Ёсць сур'ёзныя разлікі па рынках, напрамках збыту прадукцыі, - падкрэсліў прэм'ер-міністр, словы якога прыводзіць БЕЛТА.

Кіраўнік урада адзначыў, што на яго добрае ўражанне зрабілі кіраўнікі прадпрыемстваў:

Бачна, што яны ведаюць, што трэба рабіць. З вясны значна умацаваны кадравы патэнцыял дырэктарскага корпуса. Адбыліся замены, і я бачу, што кіраўнікі глыбока разумеюць вытворчасць, ведаюць тэхналогіі, бачаць перспектывы. Закладзена база для таго, каб зрабіць з Аршанскага раёна ўзорны, які будзе арыенцірам для іншых.

Аднак трэба вялікая праца: "Існуючыя на прадпрыемствах праблемы вельмі глыбокія. Яны не вырашаюцца за дзень, за месяц, і нават за год".

Асаблівая зацікаўленасць урада Аршаншчынай была выкліканая не маніторынгам сітуацыі па краіне, а суворым вызначэннем Аляксандра Лукашэнкі, які прыязджаў у Барань 12 траўня на Вялікдзень - роўна праз два месяцы пасля пратэстаў у Оршы супраць Дэкрэту на дармаедаў. Тады Лукашэнка заявіў, што Аршанскі рэгіён знаходзіцца ў "руінах і попелу", адкуль яго неабходна тэрмінова даставаць. Але з таго часу на аршанскіх прадпрыемствах нічога істотна не змянілася, акрамя кіраўнікоў.