Дыспетчар Аршанскага ГРАНС старшына ўнутранай службы Казакоў А.М, пераканаў жыхара горада адкрыць дзверы супрацоўнікам міліцыі, тым самым прадухіліўшы выбух газу ў шматпавярховым доме.
19 студзеня ў 14-39 ў Аршанскі ГРАНС паступіў званок ад мясцовага жыхара, які паведаміў, што ён збіраецца падарваць бытавы газ у кватэры ў дзевяціпавярховым жылым доме па праспекце Тэкстыльшчыкаў. Дыспетчарам Аршанскага ГРАНС, старшыной ўнутранай службы Казаковым А.М., пасля заканчэння размовы з грамадзянінам было неадкладна паведамлена ў дзяжурную частку Аршанскага РАУС, піша сайт МНС. Як высветлілася, нарад міліцыі па дадзеным адрасе ўжо знаходзіўся на месцы, але патрапіць у кватэру не мог. Таксама было паведамлена аб дадзеным факце ў «Оршагаз».
У гэты час мужчына зноў патэлефанаваў на Лінію 101, і ў ходзе працяглай размовы з заяўнікам, дыспетчару ўдалося ўгаварыць адкрыць дзверы работнікам міліцыі. Пасля таго, як супрацоўнікі міліцыі праніклі ў кватэру, яны затрымалі грамадзяніна, які тэлефанаваў і перакрылі газ.
Мужчына на самай справе адкрыў фаеркі газавай пліты, факт загазаванасці памяшкання ўнеслі ў пратакол работнікі «Оршагазу».
