Начальнік аддзелу ўнутраных спраў Аршанскага райвыканкама падпалкоўнік міліцыі Дзмітрый Бялкоўскі 31-га студзеня правёў шыхтовы агляд асабовага складу Аршанскага РАУС. Была правераная гатоўнасць міліцыянтаў да нясення службы. Перад агледзінамі падпалкоўнік выступіў перад асабовым складам і заявіў, што ў Аршанскі РАУС уваходзіць больш за дзясятак падраздзяленняў, у кожнага з якіх свае функцыі. Аднак супольная задача – забеспячэнне бяспекі грамадзян, прафілактыка, недапушчэнне здзяйснення правапарушэнняў і злачынстваў, звядзенне іх да мінімуму, - словы Бялкоўскага прыводзіць сайт МУС. Акрамя таго, на шыхтаванні прысутнічалі кіраўнік ветэранскай арганізацыі Уладзімір Яўсееў і настаяцель праваслаўнага храма Раства Багародзіцы протаерэй Валер Сярко, вядомы сваёй непавагай да беларускай мовы. Святар асвяціў кабінеты.

Госці шыхтавога агляду адзначылі, што міліцыянт, акрамя фізічных, павінен валодаць яшчэ і высокімі маральнымі якасцямі. На сустрэчы былі названыя і найлепшыя з лепшых. Па выніках працы за 2017 год былі названыя лепшыя ў прафесіі. Імі сталі начальнік спецыялізаванага ізалятара аддзелу ўнутраных спраў падпалкоўнік Андрэй Правалінскі і старшы інжынэр аператыўнай сувязі групы сувязі РАУС капітан Дзмітрый Гаравец. Шэраг супрацоўнікаў атрымалі новыя званні за якасную службу, а праваслаўны святар перадаў у рукі падпалкоўніку Бялкоўскаму ікону.