Старшыня Аршанскага райвыканкаму Аляксандр Пазняк у эфіры тэлеканалу "Беларусь 1" заявіў пра шэраг пазітыўных зменаў, якія ён знайшоў на даручанай яму зямлі за апошні час. У прыватнасці, Аляксандр Пазняк заявіў, што колькасць беспрацоўных у Аршанскім раёне ў 2017 годзе скарацілася на траціну.

За 2017 год у нас на траціну знізілася колькасць беспрацоўных. Усе жадаючыя, хто хацеў прайсці перападрыхтоўку або атрымаць дадатковую спецыяльнасць, атрымалі такую магчымасць. Акрамя таго, у пачатку гэтага года мы ствараем у Аршанскім раёне два бізнес-інкубатары, каб дапамагчы тым людзям, якія хацелі б стварыць свой бізнэс.

Мы разумеем, як і ў якім напрамку павінны развівацца прамысловыя і сельскагаспадарчыя прадпрыемствы. Вызначаны новыя праекты: некаторыя ў стадыі фармавання праектна-каштарыснай дакументацыі, па некаторых ужо пачынаецца будаўніцтва, перадае словы старшыні БЕЛТА. Пад Балбасава ў нас будуецца буйны транспартна-лагістычны цэнтр. Што тычыцца Барані, мы працуем над развіццём завода "Тэхніка сувязі".

Акрамя таго, старшыня Аршанскага райвыканкама засяродзіў увагу і на новым корпусе бальніцы ў цэнтры горада. Ён адзначыў, што ў ім усталявана сучаснае абсталяванне, а бальніца будзе служыць не толькі жыхарам Оршы, але і ўсяго раёну.

У той жа час, як раней паведамлялі актывісты незалежных прафсаюзаў, верыць у афіцыйную статыстыку беспрацоўя не варта. Рэальная колькасць беспрацоўных перавышае афіцыйную ледзь не ў дзесяць разоў. Абсалютная большасць людзей, якія не могуць знайсці працу, не рэгіструюцца на біржы працы, шукаюць працу самастойна. А скарачэнне беспрацоўя на траціну, пра якое кажа Аляксандр Пазняк, гэта, найбольш верагодна, проста зняццё з уліку людзей, якія адвучыліся на адмысловых курсах. Яны ўжо знятыя з уліку на біржы, але гэта зусім не азначае, што яны знайшлі стабільную працу.