Беларускае становіцца ўсё больш папулярным. Адчуўшы запыт ад людзей на родную культуру і ідэнтычнасць, трэнд падчапілі і пачалі выкарыстоўваць вытворцы тавараў - пачынаючы ад мабільнікаў Самсунг, якія рэкламуюцца на беларускай мове, скончваючы півам, якое, нават, адмыслова варыцца да нацыянальных святаў.
Дайшоў гэты трэнд і да Оршы. І першым яго падхапіў завод сыроў. Завод запусціў у продаж марозіва пад назвай "Беларускі пламбір". Упакоўка марозіва ўтрымлівае шмат элементаў нацыянальнага арнаменту, сама назва напісана на беларускай мове. Хаця ўвесь іншы тэкст (кантакты, склад прадукта і г.д.) аформлены на расейскай мове, што і не дзіўна - прадукт падрыхтаваны і для продажу ў Расіі. Калі дакладна быў запушчаны прадукт - не вядома, нейкай шумнай прэзентацыі не было, а сайт прадпрыемства пра "Беларускі пламбір" нічога не паведамляе.
