Цяпер лёсам Аршанскага авіярамонтнага завода зацікавіўся тэлеканал «Беларусь 1», а сюжэт пра балбасаўскае прадпрыемства паказалі ў перадачы «Галоўны эфір». Гендырэктар Адкрытага акцыянернага таварыства «Аршанскі авіярамонтны завод» Павел Случак ужо пяты кіраўнік пасля прыходу ўкраінскага інвестара «Матор Січ». Ён назваў агульную суму запазычанасці завода ў памеры 35 мільёнаў даляраў, што з“яўляецца вельмі адчувальнай сумай. Аднак «Матор Січ» пакуль ніяк не імкнецца расплочвацца па пазыках і, больш за тое, прыпыніла ўсю мадэрнізацыю прадпрыемства, якая, папраўдзе, амаль і не пачыналася.

На заводзе амаль штогод змяняюцца кіраўнікі, прычым адзін з іх, Уладзімір Троіцкі, зараз адбывае турэмнае пакаранне, але па яго справе ў сваякоў ёсць пытанні, наколькі абгрунтавана была заведзена крымінальная справа і хто вінаваты. Што датычыцца Вячаслава Багуслаева і яго кампаніі, дык украінскія інвестары, здаецца, згубілі цікавасць да ААЗ, хаця раней выношвалі салідныя планы па пераўтварэнні прадпрыемства на вядучае і ўзорнае ў рэгіёне.

Відаць па ўсім, у самы бліжэйшы час Аршанскі авіярамонтны завод чакаюць перамены, хутчэй за ўсё, пачнецца пошук новага інвестара, а справа зноў будзе на кантролі ў самых высокіх кабінетах краіны.