Усе буйныя міжраённыя цэнтры Беларусі аснасцяць ангіёграфамі на працягу 2-3 гадоў, паведаміў журналістам галоўны спецыяліст упраўлення арганізацыі медыцынскай дапамогі Міністэрства аховы здароўя Аляксандр Вербавікоў. Ангіграфічная дапамога сёння аказваецца ў Менску і абласных цэнтрах, а таксама ў Пінску, Салігорску, Оршы, Баранавічах. У 2018 годзе ангіёграф з'явіцца ў Наваполацку. "На працягу бліжэйшых некалькіх, думаю, 2-3 гадоў такая дапамога будзе аказвацца ва ўсіх буйных міжраённых цэнтрах, у тым ліку Мазыры, Лідзе, Бабруйску", - сказаў Аляксандр Вербавікоў.

Па словах галоўнага спецыяліста ўпраўлення, аказанне кардыялагічнай дапамогі насельніцтву — адзін з прыярытэтных напрамкаў айчыннай аховы здароўя. Гэта звязана не толькі з высокай распаўсюджанасцю сардэчна-сасудзiстых захворванняў, але і неабходнасцю паляпшэння іх прафілактыкі і лячэння. Для аказання якаснай, даступнай дапамогі пацыентам з хваробамі сістэмы кровазвароту (ХСК) выбудаваная стройная стабільная сістэма, якая функцыянуе і ўключае чатыры ўзроўні, піша БЕЛТА. Першарадная задача лекара любой спецыялізацыі ў амбулаторна-паліклінічным, стацыянарным звяне - вымярэнне артэрыяльнага ціску. Пры выяўленні высокіх лічбаў і фактараў рызыкі пацыента накіроўваюць да тэрапеўта, кардыёлага, адзначыў Аляксандр Вербавікоў. На працягу некалькіх гадоў у Менску, абласных і раённых цэнтрах праводзяцца шырокамаштабныя інфармацыйна-адукацыйныя акцыі па прафілактыцы неінфекцыйных захворванняў, у тым ліку ХСК. Яны праходзяць штотыдзень на вытворчасцi, у гіпермаркетах, аптэках, установах аховы здароўя. У прыватнасці, у Мінску за першае паўгоддзе праведзена 2 116 такіх мерапрыемстваў з удзелам 135,5 тыс. чалавек.