Так званы "Вялікі тэрор" 1930-х гадоў закрануў мільны чалавек - нехта быў растраляны, нехта сасланы. І лёс многіх з гэтых людзей да гэтае пары не высветлены: не ўсе архівы адкрытыя, не ўсе месцы растрэлаў даследваны. Тым больш каштоўна, што і праз тагі доўгі час удаецца знаходзіць звесткі пра ахвяраў камуністаў.
Ініцыятыве "Кабылякі. Растраляныя ў Оршы" ўдалося высветліць лёс ксяндза Адольфа Кашыца. Кашыц быў паляк па нацыянальнасці, нарадзіўся ў 1888 годзе ў вёсцы Казяны Віленскай губерніі, якая знаходзіцца не далёка ад Ашмянаў. У 1914 годзе пасля сканчэння Жытомірскай семінарыі стаў святаром і з 1917 года служыў у мястэчку Клевань каля Роўна ва Ўкраіне. У 1920 годзе яго пераводзяць служыць ў мястэчка Ружын Чквірскага дэканату, таксама ва Ўкраіне. У час службы тут ён неаднаразова арыштоўваўся. Першы раз яго арыштавалі ў 1927 годзе па абвінавачанні ў "растраце грамадскай маёмасці і грошай". Бальшавікі палічылі, што ён растраціў маёмасць свайго прыхода за што той атрымаў 3 месцы прымусовых работаў.
У 1931 годзе ксёндз зноў арыштоўваецца. На гэты раз абвінавачанне ў "правядзенні сістэматычнай контррэвалюцыйнай агітацыі супраць савецкай улады сярод грамадзян польскай нацыянальнасці", а таксама ў тым, што "выкарыстоўваючы рэлігійныя пачуцці, рыхтаваўся да пераходу мяжы".Следства накіравала разгляд справы Кашыца Тройцы ГПУ з прапановай адправіць таго ў лагеры на 8 год.
Далейшы лёс ксяндза для даследчыкаў быў не вядомы. Не так даўно сябры ініцыятывы "Кабылякі. Растраляныя ў Оршы" атрымалі магчымасць папрацаваць з так званым "Адкрытым спісам" - спіс ахвяраў сталінскіх рэпрэсій, які атрымалася скласці за шмат гадоў. Пры тым, што спіс гэты не поўны, з дапамогай яго раскрываюцца некаторыя таямніцы тых часоў. Нечакана ў спісе ўсплыло і прозвішча Адольфа Кашыца.
Як аказалася, у 1937 годзе ксёндз апынаецца ў Оршы дзе служыць у мясцовым касцёле і жыве па адрасе Кірава, д. 25.
Тут Кашыц таксама не застаўся без увагі камуністаў. 22 верасня 1937 года ён арыштоўваецца НКУС і абвінавачваецца ў шпіянажы на карысць Польшы - стандартнае абвінавачанне для таго часу. 113 дзён ён праводзіць у турме, а пазней атрымлівае прыгавор - растрэл. 17 студзеня 1938 года Адольф Кашыц растраляны. Відавочна, што ксяндза растралялі ў Оршы, але дзе дакладна пры нашых закрытых архівах высветліць не магчыма.
Па сведчаннях відавочцаў, якія запісалі краязнаўцы, святароў часцей растрэльвалі ў лесе на Магілёўскай шашы.
