Валянціна Іванаўна Вішнеўская раней працавала ў Барысаве на танкарамонтным заводзе. Пад час візіту Лукашэнкі на "Тэхніку сувязі" ён быў надта не задаволены пабачаным. Менавіта пра гэты завод ён казаў, што пабачыў дохлых пацукоў, прэзерватывы "ды іншыя наркотыкі".
Відавочна, што з-за гэтага цяпер і паўстала пытанне пра змену дырэктара завода. Па нашай інфармацыі, на гэтым тыдні Валянціна Іванаўна напісала (ці была вымушана напісаць) заяву аб сыходзе з пасады. Пакаранне, дарэчы, атрымалі і кіраўнікі цэху ў якім знайшліся пацукі "ды іншыя наркотыкі". Начальнік цэху атрымала папярэджанне аб няпоўнай службовай адпаведнасці, а намеснік начальніка цэху пазбавіўся прэміі.
Зараз абавязкі дырэктара выконвае галоўны інжэнер завода Дзяніс Багамаз.
Варта адзначыць, што "Тэхніка сувязі" (раней "Лёс" і "Чырвоны кастрычнік") - завод на якім найчасцей мяняліся дырэктары. За апошнія 45 гадоў на ім змянілася, прынамсі, 15 дырэктароў.
Дарэчы, са зменай дырэктара некаторыя работнікі звязваюць збой у рэгулярнасці выплаты заробку на пару дзён. Раней заробак і шэраг іншых выплатаў на заводзе выдавалі 20-га - 21-га чысла, а зараз у прывычныя даты грошы людзі не атрымалі.
