«Зялён явар, дуброва. Музыка Полаччыны»– прэзентацыя першага музычнага альбома фальклорнага гурта “Варган” прайшла ў Полацку. У яго ўвайшло 18 музычных твораў, абрадавыя і пазаабрадавыя песні, "цярэшкі" ды інструментальныя найгрышы. Імпрэза адбылася ў канцэртнай залі Полацкага калегіума. У якасці бонуса — запіс купальскай песні ад аўтэнтычнай спявачкі Алімпіяды Міхайлаўны Шчарбаковай з вёскі Шастова Полацкага раёна. У стварэньні інструмэнтальнай часткі альбома прымалі ўдзел запрошаныя музыкі — вядомы майстар, музыка і мастак Алесь Лось (дуда, колавая ліра), а таксама Алеся Сівохіна (цымбалы).
Частка кампазіцыяў запісвалася ў Полацку (запіс, звядзенне — Алесь Лось), частка — у Менску (запіс, звядзенне, майстарынг — Арцём Петрашкевіч і Валер Бяляеў). Дызайн вокладкі стварыла Святлана Клепікава.
Падтрымаць гурт прыехалі фольк-гурт “Рада”, Сяржук Доўгушаў, сябры, землякі ды іншыя. Прычым, як адзначыла кіраўнік "Варгана" Вольга Емельянчык, менавіта дзякуючы Сержуку Доўгушаву альбом быў добра прарэкламаваны, былі знойдзены неабходныя тэксты, а на выданне ўрэшце знайшлі грошы дзякуючы таму, што неабыякавыя людзі ахвяравалі ўласныя грошы.
Сяржук Доўгушаў — лідэр гурта "Vuraj", беларускі музыка і спявак фальклорнага кірунку. Валодае ігрой на шэрагу рэдкіх беларускіх інструментаў. Паходзіць з вёскі Тарчылава, дзяцінства і юнацтва непарыўна звязаныя з Оршай.
Фота з прэзентацыі альбому ў Полацку Радыё Рацыя.
Ужо 20-га кастрычніка прэзентацыя альбома адбудзецца ў Віцебску ў арт-прасторы Vzap (вул.Кастрычніцкая, 2).
Альбом "Зялён явар, дуброва. Музыка Полаччыны" з'явіўся і на платформе Soundcloud. Таксама ў Менску ў "Акадэмкнізе" ўжо можна набыць унікальную плыту.
