Упраўленне Дэпартамента фінансавых расследаванняў Камітэта дзяржаўнага кантролю выявіла, што індывідуальны прадпрымальнік з Оршы, які гандляваў у Расеі беларускай сельскагаспадарчай прадукцыяй, некалькі гадоў не вяртаў у краіну валютную выручку і ўхіляўся ад падаткаў. Праверка ўстанавіла, што аршанскі бізнесовец у 2013-2017 гадах вывозіў у РФ зерне, бульбу, цыбулю, яблыкі, вырабленыя беларускімі сельгаспрадпрыемствамі, і прадаваў гэтую прадукцыю суб'ектам гаспадарання, якія гандлююць на рынках Масквы і іншых буйных гарадоў. Пры гэтым выручка ў расейскіх рублях ад экспарту тавараў на разліковы рахунак індывідуальнага прадпрымальніка не залічваліся, у выніку незварот валюты склаў каля 400 тысяч рублёў у эквіваленце, пішуць ННВ. Акрамя таго, індывідуальны прадпрымальнік не заплацiў ў бюджэт падатак на даданую вартасць на суму больш за 27 000 рублёў.

Па выніках праверачных і аператыўна-вышуковых мерапрыемстваў у дачыненні да камерсанта распачалі крымінальныя справы па артыкуле 225 (невяртаньне з-за мяжы валюты) і частцы 1 артыкула 243 (ухіленне ад выплаты сум падаткаў, збораў) КК. Таксама пад крымінальную справу трапіў кампаньён прадпрымальніка - у дачыненні да гэтага жыхара Оршы, які аказваў садзейнічанне земляку, распачаты крымінальны пераслед, пра гэта паведамілі ў прэс-службе КДК.