Да 17 градусаў марозу апусціўся слупок тэрмометраў у ноч з 8 на 9 студзеня на Аршаншчыне-паведамляюць сіноптыкі. Хаця ў некаторых месцах раёну і, нават, гораду градуснікі паказвалі і мінус 19. Гэта самыя нізкія тэмпературы ў гэтую ноч па краіне. Нешта падобнае было толькі ў паўднёвых Горках ды Мсціслаўле - там тэмпература апусцілася да 16,9 градусаў. Для параўнання: у Гродна ў тую ж ноч тэмпература дасягнула ўсяго толькі мінус 6,4 градусаў, а ў Брэсце мінус 5,3.
Марозы пасля праваслаўнага Раства - рэч звычайная, але мінус 17 градусаў гэта значна ніжэй за так званую "кліматычную норму" на 11 градусаў.
Але, як прагназуюць сіноптыкі, цяпер тэмпература пачне па крысе расці. Днём 9 студзеня слупок тэрмометра мусіць падняцца да 10 градусаў, а заўтра - 10 студзеня - і да 7 градусаў. У суботу тэмпература можа дасягнуць ужо 0. А на наступным тыдні і замацуецца на гэтай адметцы.
Праўда, замест халадоў прыйдзе іншая бяда - на дарогах прагназуецца доўгатэрміновае абмежаванне бачнасці. У чацвер у першай палове дня прагназуецца снег, а ў другой палове дня дымка. У пятніцу ў першай палове дня будзе моцны туман, а ў суботу завіруха.
