Ужо шмат гадоў вандалы сям-там разбіваюць у Оршы вітрыны крамаў, рэкламныя шчыты, прыпынкі — словам усё, дзе ёсць шкло. Наш сайт неаднаразова пісаў і змяшчаў здымкі разбітых вітрынаў і прыпынкаў на галоўнай вуліцы горада — Леніна, нейкі час амаль усе прыпынкі па вуліцы былі разбітыя. Менавіта там зараз і быў затрыманы вандал. Звычайна хуліганы застаюцца беспакаранымі, верагодна, яны наносяць шкоду ўначы і паспяхова скрываюцца да прыезду міліцыі. Але на гэты раз усё было не так, ды і ўзрост хулігана быў нетыповым — 42 гады. Да таго ж, мужчына біў шкло пры мінаках на вуліцы. Менавіта жанчына, якая ў гэты час і праходзіла міма, паклікала патрульных.
Фота УУС
Пагром хуліган сярэдніх гадоў зладзіў каля дома № 54 па вуліцы Леніна. Ён ішоў па Раніцы п'яным і разграміў два рэкламных шчыты. У дачыненні да вандала распачата крымінальная справа па частцы 1 артыкулу 339. Матэрыяльная шкода — 100 рублёў.
