З 9 снежня мінулага года з Оршы на Лепель пачаў хадзіць цягнік рэгіянальных лініяў бізнэс-класу, у народзе называемы "Штадлер". За дзве гадзіны 13 хвілін з адным толькі прыпынкам у Чашніках па дарозе гэты цягнік даязжаў да Лепеля і хадзіў кожны дзень.

Навіна пра гэты цягнік на нашым сайце тады набрала вельмі шмат скептычных каментароў - людзі не верылі, што новенькі Штадлер будзе папулярным у пасажыраў, бо па гэтай лініі звычайна ездзіць мала людзей. Сапраўды, лінія Орша-Лепель праходзіць пераважна праз вёскі, з гарадоў па дарозе толькі не вялікія Чашнікі. І калі на дызелю пасажыры яшчэ катаюцца да лецішчаў ці на рыбалку-па грыбы, то без прыпынкаў у вёсках матывацыі скарыстацца цягніком застаецца мала.

Меньш чым праз два месяцы гэта стала зразумела і для адміністрацыі чыгункі. Таму цяпер штадлер на Лепель стаў хадзіць толькі тры разы на тыдзень - у пятніцу, суботу і нядзелю. Па рабочых днях цягнік адменены. Крыху змяніўся і расклад руху цягніка. Ранеё ён выязжаў з Оршы а 11-40, а цяпер на тры хвіліны раней. І ў дарозе па новым графіку штадлер праводзіць на 10 хвілін меней - 2 гадзіны 3 хвіліны замест ранейшых 13 хвілін.

Увогуле чыгуначная лінія Орша-Лепель самая мала задзейнічаная з усіх ліній ад Оршы. Акрамя штадлера тут ходзіць толькі два пасажырскіх дызелі раніцай і вечарам і звычайна адзін "таварняк" на суткі, які даязжае на Навалукамля, што крыху ў баку ад накірунка на Лепель.