Аляксандр Лукашэнка зацвердзіў сваім указам дзяржаўную інвестыцыйную праграму на 2019 год. Пра гэта паведамляе прэс-служба прэзідэнта Беларусі. Усяго ў праграму ўключаны 113 аб'ектаў. На іх фінансаванне ў гэтым годзе прадугледжваецца накіраванне 511 млн рублёў, у тым ліку 189 млн - за кошт дзяржаўных капітальных укладанняў, 80 млн - за кошт сродкаў дзяржаўнага мэтавага бюджэтнага фонду нацыянальнага развіцця, 80 млн - са сродкаў рэзервовага фонду прэзідэнта, 95 млн - з сродкаў рэспубліканскага дарожнага фонду і 46 млн - са сродкаў на захаванне і пашырэнне сельскагаспадарчых угоддзяў. Перш за ўсё фінансавыя сродкі будуць сканцэнтраваны на аб'ектах, якія ўводзяцца ў эксплуатацыю у 2019 годзе, і на пераходных аб'ектах з высокай ступенню будаўнічай гатоўнасці.

У адпаведнасці з дзяржпраграмай, у 2019 годзе намечана пачаць фінансаванне будаўніцтва і рэканструкцыі 26 аб'ектаў, у тым ліку корпуса хірургіі і транспланталогіі ў Менску, інтэрната Гарадзенскага дзяржаўнага ўніверсітэта на 1030 месцаў, абласнога анкалагічнага дыспансера ў Гародні, арэнднага дома для медыцынскіх работнікаў у вёсцы Андрэеўшчына Аршанскага раёна, 9 жылых дамоў для сем'яў, якія выхоўваюць дзяцей-сірот, аварыйнага моста праз раку Піна на аўтамабільнай дарозе Р6 Івацэвічы - Пінск - Столін і пуцеправода-дублёра па вуліцы Якубоўскага ў Магілёве.

Усяго ў бягучым годзе плануецца ўвесці ў эксплуатацыю 42 аб'екты.