Грамадская ініцыятыва, якая аб'ядноўвае нашчадкаў ахвяраў Сталінскіх рэпрэсій у гэтым годзе была намінавана на ўсе прэміі для грамадскіх арганізацый. "Кабылякі. Растраляныя ў Оршы" былі намінаваныя як "Новая ініцыятыва" ў прэміі "Чэмпіёны грамадзянскай супольнасці", але тут саступілі перамогу створанаму Ўніверсітэту імя Ніла Гілевіча. А ў прэміі "Зрабілі!" ініцыятыва атрымала прэмію разам з яшчэ 16-цю іншымі арганізацыямі.
На выходных стала вядома, што "Кабылякі" атрымалі яшчэ адну прэмію - прэмію імя Віктара Сірыцы. Гэтую прэмію некалькі год таму заснаваў "Рух за свабоду", ёй узнагароджваюцца толькі рэгіянальныя актывісты. Кожны год прэмію атрымліваюць не больш за два чалавекі - адзін вызначаецца меркаваннем журы, другі меркаваннем грамадскасці. Такім чынам сярод 20 намінантаў у гэтым годзе прэмію ад журы атрымаў каардынатар ініцыятывы "Кабылякі. Расстраляныя ў Оршы" Ігар Станкевіч.
