Больш чым тыдзень таму мы пісалі пра аршанца, які самастойна стаў замазваць графіці з рэкламай наркотыўкаў, якія вельмі масава з'явіліся ў горадзе. Аказалася, што такая ініцыятыва адзіная на сёняшні дзень у краіне, прынамсі, з тых пра якія пісалі журналісты. Гэта зацікавіла і нашых калегаў з Радыё "Свабода", якія зрабілі вялікі матэр'ял пра Андрэя Корпса, які і выйшаў на змаганне з нарка-рэкламай.
Як распавёў герой артыкула "Свабодзе", ён сам былы наркаман. У 15 год паспрабаваў "траву" і панеслася. Пазней былі опіюм, другія наркотыкі, у тым ліку і цяжкія пасля якіх ужо мала хто вяртаецца да нармальнага жыцця. Спробы "саскочыць" з залежнасці прыводзілі да запояў. У выніку Андрэй страціў сям'ю, працу, пабываў за кратамі, але жаданне жыць перамагла. У выніку Андрэй змог кінуць дрэнную звычку, другі раз ажаніўся, завёў дачку, знайшоў працу і стаў радыкальным праціўнікам любых наркотыкаў.
Спачатку - калі ў Оршы пачалі масава з'яўляцца графіці, якія рэкламуюць наркотыкі - Андрэя гэта раздражняла. Але потым пачало зліць, асабліва тое, што надпісы гэтыя былі па дарозе да школы. Тады Андрэй і праявіў ініцыятыву - сам узяў фарбу, пэндзаль і пачаў са свайго раёна. Сёння на рахунку ў былога наркамана больш за 50 знішчаных рэкламных графіці. Цалкам прачытаць артыкул "Свабоды" можна тут.
Спадзяемся, што Андрэй не застанецца адзіным ні на ўсю краіну, ні ў нашым горадзе. Кампанію па зафарбоўванні графіці па ўсім горадзе рыхтуе і АМГА "Звяз". На дадзены момант ужо прайшлі кансультацыі з высокапастаўленнымі міліцыянтамі.
