Цяпер для тых хто з цэнтра Оршы (і некаторых іншых прыпынкаў) будзе ехаць у суседнія раёны ці вёскі на аўтобусе праезд будзе каштаваць прыблізна на 30 капеек даражэй. Звязана гэта не з прамым падвышэннем кошту, а з тым, што кіраўніцтва аўтапарку №3 перагледзела колькасць так званых "Тарыфных прыпынкаў".
Тарыфны прыпынак - гэта прыпынак ад якога пачынае дзейнічаць іншая тарыфная зона - кошт да тарыфнага прыпынку да вашага прыпынку будзе крышачку даражэй ці танней. На практыцы гэта выглядае так: вы кудысці едзіце з аршанскага аўтавакзалу і праязжаеце праз прыпынак "Цэнтар". Дык, вось, з аўтавакзалу кошт вашага праезду каштаваў, дапусцім, 1 рубель. Тады як, калі б вы селі на той жа аўтобус у "Цэнтры", то кошт склаў бы 70 капеек. Але з 1 мая "Цэнтар" губляе статус "тарыфнага прыпынку". Адпаведна, сядзіце вы на Аўтавакзале ці ў "Цэнтры", вы ўсё адно заплоціце 1 рубель. Такім чынам, без адмысловага рашэнне пра павелічэнне тарыфаў кошт аўтобусаў для аршанцаў крышачку вырас.
Акрамя "Цэнтра" статус тарыфнага прыпынку губляюць прыпынкі "Гандлёвы цэнтар" (у народзе "Купец"), "Паварот на Сельгастэхніку" і "Мясакамбінат".
