У паўфінале аршанцы гулялі супраць каманды «Сянно» — аднаго з вядучых клубаў Віцебскай вобласці апошніх гадоў. Праўда, мінулы сезон сенненцы правалілі, і цяпер спрабуюць вярнуцца на стары ўзровень. «Мясакамбінат», у складзе якога шмат вядомых аршанскіх футбалістаў з досведам 1 і 2 ліг чэмпіянату Беларусі, актыўна ўзяўся за справу з першых хвілін. Ужо на 3-й хвіліне аршанцы зарабілі 11-метровы. Ілля Шчуканцоў, які яшчэ летась гуляў за «Оршу» ў Першай лізе, рэалізаваў пенальці. На 30-й хвіліне «Сянно» зраўняла лік намаганнямі Панчанкі, але перад свістком на перапынак вызначыўся Раман Малафееў, «Мясакамбінат» зноў павёў, цяпер ужо 2:1.

Публіка на Гарадскім стадыёне Сянна чакала паспяховай гульні ад сваёй каманды, і жоўта-зялёныя сапраўды зрабілі ўсё што маглі. Але дубль Шчуканцова на 69-й хвіліне сапсаваў ім карціну. На 75-й аршанцы парушылі правілы ў штрафной і прапусцілі з пенальці, але перамаглі 3:2 і прайшлі ў фінал.Там «Мясакамбінат» сустрэнецца з «Полацкам», якому прайграў фінал абласнога кубка ў 2017-м. Праўда, тады «Мясакамбінат» не заяўляўся на чэмпіянат вобласці, а цяпер гуляе ў ім.

А вось у такім складзе «Мясакамбінат» правёў пераможна матч у Сянне: Камароў; Хомчанка, Кальм Аляксандр І., Склязноў (Пятроўскі, 75); Піваровіч; Івулін (к) (Рымкевіч, 80), Малафееў (Сухадольскі, 69), Кальм Аляксандр У., Гарбенка (Раманаў, 36), Шчуканцоў, Швядко (Белкін, 90).