Orsha.eu працягвае публікацыю вынікаў мінулага году. У першы дзень чэрвеня мы пісалі аб тым, як наш зямляк Сяржук Доўгушаў ладзіць канцэрты для беларускай дыяспары Канады.
У Шклоўскім раёне адбыўся напад на міліцыянта, ён ня выжыў, атрымаўшы вялікія апёкі.
Было і насычанае асвятленне сацыяльнай сферы. Жыхары вуліцы 1-ая Красная, у раёне Усходняй, паскардзіліся на непрыдатны стан горкі і наогул адсутнасць нармальнай дзіцячай пляцоўкі. Жыхары Вусця тым часам даслалі відэа катастрафічнага стану дарогі ў вёску. У Берасценаве ж працягнула развальвацца старая сядзіба, усё імкліва знікае пры поўнай абыякавасці ўладаў. У Смалянах жа абваліўся купал на старой праваслаўнай царкве, на якую ўлады таксама махнулі рукой.
Некаторым гістарычным помнікам «дапамагалі». Шкодная і злачынная ідэалогія «русского мира» стала прычынай вандалізму ў Кабыляках, на народным мемарыяле памяці бязвінна расстраляных камуністамі людзей.
Сярод адметных падзей на дарозе: у Воршы адбылася пагоня са стралянінай, а на вуліцы Кірава грузавік уехаў у таксоўку.
Былі і навіны Ютубу. Наш сайт запусціў рубрыку «Прыватнае меркаванне». Цягам некалькіх месяцаў мы паказвалі чытачам уласны погляд на некаторыя вострыя праблемы. А гулец аршанскага міні-футбольнага «Вітэну» стаў папулярным у інтэрнэце дзякуючы сваім гульнявым якасцям, ролік паглядзелі па ўсім свеце.
