Візіты Лукашэнкі на Аршаншчыну становяцца ўсё меньш заўважнымі, калі не лічыць часова перакрытых дарогаў. 6 лістапада ён зноў наведаў Оршу. На гэты раз пабываўшы ў галоўнай бальніцы і на мясакамбінаце. Паведамленні з мясакамбінату такія, як быццам ён там і не быў: проста паглядзеў, пракантраляваў і расказ пра сам мясакамбінат. Які, дарэчы, даўно працуе са стратамі, а пасля стварэння гандлёвага цэнтру "Оріс" яшчэ і практычна пазбавіўся сваёй раздробнай гандлёвай сетцы.
Паведамленняў з бальніцы было болей. А адзінае, што стала рэзанансным - сітуацыя з кадрамі. Нарэшце Лукашэнка прызнаў, што медыкаў у краіне ўсё больш не хапае. Асабліва значны адток распачаўся ў мінулым годзе калі некалькі сецен дактароў па краіне патрапілі пад палітычныя рэпрэсіі: нехта быў звольнены за ўдзел у пратэстах, нехта патрапіў у турмы і пад катаванні - такіх гісторыяў толькі публічна было некалькі дзесяткаў. Гэта выклікала цэлую хвалю - з'язжаць пачалі не толькі ахвяры рэпрэсіяў, але і тыя хто патэнцыйна мог патрапіць пад іх.
А ў аршанскай бальніцы Лукашэнка для вырашэння медычнага крызісу прапанаваў павялічыць тэрмін абавязковай адпрацоўкі (размеркаванне) для выпускнікоў медычных навучальных установаў. Калі чыноўнікі гэта выканаюць, у чым мала сумніваў, то выпускнікі-медыкі будуць 10 гадоў прывязаныя да сваіх рабочых месцаў.
Дзяржаўныя СМІ аніяк не пракаментавалі гэтую прапанову, а ў незалежных СМІ яе абсмакавалі з усіх бакоў. Пачынаючы ад мемаў дзе сфатаграфаваныя рабы ў белых халатах, скончваючы сур'ёзнымі фразамі, што дзяржава спрабуе зноў тушыць пажар бензінам. Замест таго, каб пайсці на саступкі і хаця б спыніць палітычна матываваныя звальненні, Лукашэнка прапанаваў зрабіць умовы для медыкаў яшчэ горшымі (адпрацоўка ў якой-небудзь вёсцы ці малым мястэчку нельга назваць паляпшэннем умоваў). Атрымаецца, што калі зараз у Беларусі не хапае гатовых медыкаў, то хутка краіна не будзе мець жадаючых нават паступаць на медычныя спецыяльнасці - у гэтым сыйшлося шмат экспертаў, якія выказаліся на тэму.
