У мінчаніна Івана Занько дастаткова цікавая гісторыя зняволення. Яго затрымалі за ўдзел у адным з самых масавых маршаў пратэсту 11 кастрычніка 2020 года. Першапачаткова абвінавацілі ў тым, што Занько разам з іншымі двума ячалавекамі не далі АМАПаўцам затрымаць чалавека, учынілі патасоўку і разбілі шкло аўтамабіля. Прадказальна, што Іван не прызнаў сваёй віны, спрабаваў даказаць, што аніякай патасоўкі не было. Але калі ў краіне не да законаў...
У красавіку 2021 года адзін з мінскіх судоў прыгаварыў Івана да 5 гадоў калоніі. І тут жа завялі новую справу - арганізацыя дзеянняў, якія парушаюць грамадскі парадак. Як доказ віны абвінаваўцы прад'явілі відэа на якім мужчына - следства казала, што гэта і ёсць Іван - інструктуе людзей як станавіцца ў "счэпку". Але ж твар мужчыны быў чамусці заблюраны. І хаця ніхто так і не зразумеў, што ж за мужчына дае інструкцыі, Івану накінулі яшчэ 5 гадоў. На судзе стала вядома, што палітвязня як мінімум адзін раз змяшчалі ў ШІЗО.
З новым прыгаворам яго перавялі ў Шклоўскую калонію дзе адразу ж далі ШІЗО яшчэ раз.
Але ж і на гэтым не ўсё. Адміністрацыя калоніі абвінаваціла яго па сумна вядомым артыкуле 411 - парушэнне правілаў калоніі. Гэты артыкул вельмі зручны для адміністрацыяў калоній. Бо парушэнне можна знайсці, справакаваць, або проста выдумаць і асуджаны нічога, як паказвае практыка, даказаць не можа. Ды яшчэ і суд праходзіў на тэрыторыі калоніі і ніхто не мог даведацца ў чым абвінавачваюць Івана. Па гэтым артыкуле шклоўскі суд Івану дакінуў яшчэ год.
Як паведамляе ПЦ "Вясна", 9 лютага адбудзецца апеляцыйны суд над Іванам Занько. Гэтай апеляцыі Занько чакаў тры месяцы. Але ж у сёняшняй сітуацыі надзеі на апраўдальны вырак няма.
