У Беларусі сапраўды вялікая праблема з захаваннем помнікаў архітэктуры. Хаця ў асноўным дзяржава і станавілася прычынай іх разбурэння (асабліва культавых будынкаў) у 20-ым стагоддзі, але ж на аднаўленне іх сродкаў няма. Ды і паводле Кодэксу аб культуры ўтрымліваць іх, адпаведна і аднаўляць, павінны мясцовыя ўлады. А мясцовыя бюджэты ў нас амаль усе датацыйныя.
Таму іншы варыянт - і не рэдка ён дастаткова эфектыўны - прадаць помнікі з аўкцыёну, няхай сабе і за адну базавую. У гэтым месяцы ў нашым рэгіёне як мінімум два помнікі пойдуць на продаж. Першы з іх - не купленая раней паштовая станцыя ў вёсцы Паграбёнка Сененскага раёна. Яна была пабудаваная каля 1840-х гадоў. Другі помнік - спіртзавод сядзібы ў вёсцы Полымя, які пабудаваны ў канцы 19 - пачатку 20 стагоддзяў.
