Хаця, здавалася б, абвастрэнне рэпрэсіяў пасля 25 сакавіка мусіла б суцішыцца, але стала вядома яшчэ пра два палітычна матываваных суды ў Аршанскім і Талачынскім раёнах. У Аршанскім судзе працэс адбыўся 7 красавіка. Аршанец, знаходзячыся ў іншым горадзе, у інстаграме апублікаваў матэр'ял сайта Zerkalo - былы Tut.by. Калі і дзе ён гэта зрабіў міліцыянты не ведаюць. У выніку мужчыну абвінавацілі ў распаўсюдзе экстрэмісцкай інфармацыі і асудзілі на 25 базавых адзінак, што не так і шмат, калі ўлічыць іншыя пакаранні па такім жа абвінавачанні.
Тое самае абвінавачнне прад'явілі жыхарцы Талачына. Яна яшчэ ў 2020 годзе нешта палітычнае перапосціла ў Тэлеграм. Нешта такое, што таксама ўлады ўнеслі ў спіс экстрэмісцкіх матэр'ялаў. У дадзеным выпадку абыйсціся штрафам не ўдалося, Талачынскі суд пакараў жанчыну на 7 сутак арышту.
